Жорий йилнинг 27 ноябрь куни Kun.uz сайтида эълон қилинган суриштирув юзасидан Божхона қўмитаси Матбуот хизмати қуйидагиларни маълум қилади.

Республикамиз божхона чегаралари орқали кунига ўртача 10-11 минг автотранспорт воситалари ҳаракатланади. 

Республикадан олиб чиқиб кетилаётган автотранспорт воситаларига нисбатан уларни бошқараётган шахслар томонидан божхона органларига тақдим этиладиган ҳужжатлар рўйхати конунчиликда аниқ белгиланган.

Автотранспорт воситаларининг божхона расмийлаштируви жараёнида ҳайдовчилардан транспорт воситасини бошқаришга доир ишончномани божхона органлари томонидан талаб қилиш қонунчиликда назарда тутилмаган. 

Божхона органлари эса қонунчиликда назарда тутилмаган тақиқлар ва чекловларни белгилашга ҳақли эмас.

Қайд этиш жоизки, Kun.uz суриштирувида назарда тутилган автотранспорт воситалари республикадан олиб чиқилаётганда ҳуқуқни муҳофаза қилувчи ёки суд идоралари томонидан уларга нисбатан амалда чеклов ёки тақиқ мавжуд бўлмаган, шунингдек, мазкур транспорт воситаларининг эгалари томонидан уларнинг олиб чиқиб кетилишига йўл қўймасликни сўраб мурожаатлар келиб тушмаган. 

Бугун Божхона қўмитаси Раҳбарияти томонидан айни шу масалада мурожаат қилган фуқаро қабул қилиниб, унга батафсил тушунтиришлар берилди.

Шу каби ҳолатларнинг олдини олиш мақсадида барча чегара божхона постларига тегишли кўрсатма ва тавсиялар юборилди.

Фуқароларнинг қонуний ҳуқуқ ва манфаатларини ҳимоя қилинишини таъминлаш мақсадида юқоридаги ҳолатлар юзасидан амалдаги қонунчилик нормаларини такомиллаштиришда Божхона қўмитаси ўзаро ҳамкорликка тайёр эканлигини ва ҳозирда мутасадди давлат идоралари билан ҳамкорликда тегишли таклифлар ишлаб чиқилаётганини маълум қилади.