Республикамиз божхоначилари йил бошидан буён 790 кг.дан зиёд гиёҳвандлик воситаларининг ноқонуний муомаласига чек қўйишди

Жумладан, Божхона қўмитасининг Контрабандага қарши курашиш бошқармаси ҳамда Давлат хавфсизлик хизмати ходимлари томонидан пойтахтимизнинг Чилонзор туманида ўтказилган тезкор тадбирда олдиндан кузатувга олинган шахс бошқарувидаги автотранспорт воситаси тўхтатилиб, белгиланган тартибда кўздан кечирилди. 

Натижада машинадаги ҳайдовчи ва йўловчининг чўнтагидан полиэтилен ўрамларда жами 165 гр. оғирликдаги “опий” гиёҳвандлик воситаси борлиги аниқланди. 

Тошкент шаҳар божхона бошқармаси тезкор тузилмалари томонидан ДХХ ва ИИВ ходимлари билан ҳамкорликда Яшнобод туманидаги офислардан бирида ўтказилган тезкор тадбирда бу ерда 953 гр. оғирликдаги “гашиш” ва уларни ўлчашда фойдаланилган электрон тарози борлиги аниқланди. 

Сурхондарё вилояти божхона бошқармасининг “Айритом”  чегара божхона постида қўшни давлатдан кириб келган  юк автотранспорт воситасини божхона кўригидан ўтказиш давомида ҳайдовчи автотранспорт кабинасидаги орқа ўриндиқ остида 37 гр. “гашиш” гиёҳвандлик воситасини яшириб қўйганлиги фош бўлди. 

Эслатиб ўтамиз, республикамиз божхоначилари йил бошидан буён аниқланган 108 та қонунбузилиши ҳолатларида 790 кг. дан зиёд оғирликдаги гиёҳванд моддаларнинг юртимизга олиб кирилиши ва ички ҳудуддаги айланмасига чек қўйишган.

Ҳозирда, юқоридаги ҳолатлар юзасидан божхона органлари томонидан жиноят ишлари қўзғатилди.