Божхона транзити 

Божхона транзити божхона режими шундай режимки, бунда:

• олиб кирилган товар жўнатувчи божхона органи ва товар келиб тушадиган божхона органи орасидаги божхона ҳудуди бўйлаб, шу жумладан чет давлат ҳудуди орқали божхона назорати остида;
• Ўзбекистон товарлари божхона чегарасида жойлашган жўнатувчи божхона органи ва товар келиб тушадиган божхона органи орасидаги чет давлат ҳудуди бўйлаб божхона божлари ва солиқлар тўланмаган, шунингдек иқтисодий сиёсат чоралари қўлланилмаган ҳолда олиб ўтилади.

Қайси божхона органи фаолият кўрсатиш зонасида товарларни божхона назорати остида ташиш бошланадиган бўлса, ўша божхона органи жўнатувчи божхона органи ҳисобланади.

Қайси божхона органи фаолият кўрсатиш зонасида товарларни божхона назорати остида ташиш тугалланадиган бўлса, ўша божхона органи товар келиб тушадиган божхона органи ҳисобланади.

Ҳар қандай товар Божхона кодексининг 117 ва 118 моддалари талабларга ва шартларга риоя этилган ҳолда божхона транзити божхона режимига жойлаштирилади:

• товарнинг божхона ҳудуди орқали транзити Ўзбекистон Республикаси қонунчилигига ва халқаро шартномаларига мувофиқ тақиқланмаган бўлса. Мисол учун 2013 йилнинг 1 январидан бошлаб божхона худуди бўйлаб автомобил транспорти билан суюлтирилган газ (ТИФ ТН КОДИ 2711*) транзити тақиқланган.
• агар қонунчиликка мувофиқ товарнинг божхона ҳудуди бўйлаб транзитига фақат тегишли рухсатномалар асосида йўл қўйилса, товарга нисбатан шундай рухсатномалар мавжуд бўлсагин рухсат этилади.

Божхона транзити божхона режимида товарни ташиш учун божхона декларацияси таыдим этилади.

Давлат божхона қўмитаси томонидан Транзит декларациясини тўлдириш, рўйхатдан ўтказиш, унга ўзгартириш ва қўшимчалар киритиш, уни бекор қилиш ва бекор қилиш тартиби тўғрисидаги низом тасдиқланди (31.08.2022 йилдаги 3382-сон).

Маълумот учун: транзит декларацияси божхона ҳудуди орқали божхона назорати остида олиб ўтилаётган товарлар тўғрисидаги маълумотларни ўз ичига олган, божхона органлари томонидан товарларнинг белгиланган божхона органига йетказиб берилишини назорат қилиш учун зарур бўлган ҳужжатдир (Божхона кодексининг 220-моддаси).

Ҳужжатга мувофиқ, транзит декларациясини тўлдириш, қайта ишлаш, унга ўзгартириш ва қўшимчалар киритиш, уни бекор қилиш ва бекор қилиш “Е-Транзит” автоматлаштирилган ахборот тизими орқали амалга оширилади.

Норматив ҳужжатлар

Ўзбекистон Республикаси Вазирлар Маҳкамасининг 2022 йил 31 декабрдаги 737-сон қарори.

Ўзбекистон Республикаси Давлат божхона қўмитасининг “Транзит декларациясини тўлдириш, рўйхатдан ўтказиш, унга ўзгартириш ва қўшимчалар киритиш, уни бекор қилиш ва бекор қилиш тартиби тўғрисидаги низомни тасдиқлаш ҳақида”ги қарори (Aдлия вазирлиги томонидан давлат рўйхатидан ўтказилган. Ўзбекистон Республикаси 2022-йил 31-август, рўйхатга олиш Но 3382)