Ўзбекистон Республикасининг “Аҳоли бандлиги тўғрисида”ги Қонунига мувофиқ, шунингдек, аҳолининг ижтимоий эҳтиёжманд тоифаларини қўллаб-қувватлаш ва уларнинг бандлигига кўмаклашиш мақсадида божхона хизмати органларининг мутахассис, хизмат кўрсатувчи ва ёрдамчи гуруҳларининг бўш иш ўринларига Ўзбекистон Республикаси Вазирлар Маҳкамасининг 2022 йил 31-августдаги 486-сон қарори 1-иловаси билан тасдиқланган «Ногиронлиги бўлган шахслар учун тавсия этилган ишчи касблар ва хизмат лавозимларининг намунавий рўйхати (классификатори)»га мувофиқ ногиронлиги бор бўлган, меҳнатга лаёқатли ва меҳнат қилиш истагини билдирган Ўзбекистон Республикаси фуқаролари ишга қабул қилинади.

Ногиронлиги бўлган шахсларни ишга жойлаштириш Ўзбекистон Республикаси Камбағалликни қисқартириш ва бандлик вазирлиги ҳамда Ижтимоий ҳимоя миллий Агентлиги ҳамда унинг ҳудудий бошқармалари ва марказлари билан ҳамкорликда амалга оширилади.

Ишга қабул қилиш шартлари:

1. Ишга қабул қилишга Меҳнат кодексининг 20-моддасига мувофиқ йўл қўйилади;
2. Ўзбекистон Республикаси фуқаролигига эга;
3. Бўш иш ўрни учун белгиланган малака талаблари (маълумоти, мутахассислиги);
4. Тегишли тиббий-ижтимоий экспертиза комиссияси томонидан берилган хулосага мувофиқ фуқаронинг соғлиғининг ҳолатига кўра таклиф этилаётган лавзимда ишлаш учун қарши кўрсатма мавжуд бўлмаган;
5. Таклиф этилаётган бўш иш ўрни учун белгиланган махфий ҳужжатлар билан ишлаш учун тегишли рухсатнома шаклига эга бўлган фуқаролар (бунда махфий ҳужжатлар билан ишлаш учун рухсатнома талаб этилмайдиган лавозимлар мустасно) ишга олинади.

Ишга кириш юзасидан мурожаат қилиш тартиби.

Фуқаролар божхона хизмати органларининг мутахассис, хизмат кўрсатувчи ва ёрдамчи гуруҳларининг бўш бўлган лавозимларига ишга кириш истагини билдириб, интернет тармоғи орқали Ўзбекистон Миллий ваканциялар базасидан ўзлари танланган бўш иш ўринларига қизиқиш билдиришлари ва электрон рўйхатдан ўтишлари мумкин.

Шу билан бирга қўмита тизимидаги Иш берувчилар билан тўғридан тўғри боғланиб, ишга кириш юзасидан мурожаат қилишлари мумкин бўлади.

Ишга кириш истагини билдирган фуқаролар, иш берувчилар томонидан берилган жавоблардан норози бўлса ёки уларни ишга олиш бўйича муаммолар юзага келса, мазкур масала юзасидан Божхона қўмитасининг Инсон ресурсларини ривожлантириш ва бошқариш бошқармасининг 55-502-55-48, 55-502-17-88, 55-502-71-57, 55-502-13-88, 55-502-70-47, 55-502-28-80 телефон рақамларига мурожаат қилишлари мумкин.

Ишга қабул қилиш чоғида қуйидаги ҳужжатлар талаб этилади:

1. Паспорт ёки унинг ўрнини босувчи ҳужжат ёхуд идентификацияловчи ID-карта;
2. Охирги иш жойи бўйича тасдиқланган қоғоз шаклидаги меҳнат дафтарчасини ёки электрон меҳнат дафтарчасидан кўчирмани, бундан биринчи марта ишга кираётган шахслар мустасно. Ўриндошлик асосида ишга кираётган шахслар меҳнат дафтарчасининг ўрнига асосий иш жойидан олинган белгиланган намунадаги маълумотномани тақдим этади;
3. Ҳарбий хизматга мажбурлар ёки чақирилувчилар учун тегишлилиги бўйича ҳарбий гувоҳномани ёки ҳарбий ҳисобда турганлик ҳақидаги гувоҳномани;
4. Олий ёки ўрта махсус, касб-ҳунар таълим ташкилотини тамомлаганлиги тўғрисидаги дипломни, қайси ишни бажариш учун фақат махсус маълумотга ёки махсус тайёргарликка эга бўлган шахслар қўйилиши мумкин бўлса, ўша ишга кириш чоғида ушбу ишни бажариш ҳуқуқига доир гувоҳномани (сертификатни) ёхуд бошқа тегишли ҳужжатни;
5. Жамғариб бориладиган пенсия дафтарчасини, бундан биринчи марта ишга кираётган шахслар мустасно.

Ногиронлиги бўлган шахсларнинг меҳнатини ҳуқуқий жиҳатдан тартибга солишнинг ўзига хос хусусиятлари

Ногиронлиги бўлган шахсларни ишга қабул қилишдаги кафолатлар, имтиёзлар ва меҳнат ҳуқуқлари Меҳнат кодекси ҳамда тегишли меъёрий-ҳуқуқий ҳужжатлар билан тартибга солинади.

Шунингдек, қўшимча имтиёз ва кафолатлар Жамоа шартномалари билан белгиланган.