Тошкент вилоятининг “Ангрен” эркин иқтисодий зонасида Божхона қўмитасининг бошқарма бошлиқлари И.Пардаев  ҳамда О.Хасановлар иштирокида ташқи иқтисодий фаолият субъектлари билан учрашув бўлиб ўтди.

Унда Ўзбекистон Республикаси Президентининг “Махсус иқтисодий ва саноат зоналари фаолиятининг самарадорлигини ошириш бўйича қўшимча чора-тадбирлар тўғрисида” 2025 йил 4 мартдаги ПФ-41-сон Фармони, “Электротехника саноатини ривожлантиришни янги босқичга олиб чиқишга доир қўшимча чора-тадбирлар тўғрисида” ПҚ-20-сон  ва  “Божхона маъмуриятчилиги тартиб-таомилларини такомиллаштириш бўйича қўшимча чора-тадбирлар тўғрисида”ги 77-сон қарорларнинг мазмун-моҳияти юзасидан атрофлича тўхталиб ўтилди. 

Ҳужжатга биноан 2025 йил 1 июндан махсус иқтисодий зоналар иштирокчилари томонидан маҳсулотларни ишлаб чиқариш ва экспортга реализация қилиш учун фойдаланадиган импорт хомашё, материал ва бутловчи қисмларни божхона тўловларини (божхона расмийлаштируви учун йиғимлар бундан мустасно) тўламаган ҳолда “товарларни божхона ҳудудида қайта ишлаш” режимига жойлаштириш орқали уларни божхона расмийлаштирувидан ўтказиш амалиёти йўлга қўйилади.  

Шу билан бирга, Ўзбекистон Республикаси Президентининг 2025 йил 22 январдаги “Электротехника саноатини ривожлантиришни янги босқичга олиб чиқишга доир қўшимча чора-тадбирлар тўғрисида” ПҚ-20-сон қарори билан, божхона ҳудудида қайта ишлаш режимида тайёрланган маҳсулотларни кейинги ишлаб чиқарувчилар томонидан саноат кооперацияси тартибида қайта ишлаш учун божхона ҳудудида қайта ишлаш режимига жойлаштиришга рухсат берилади.

Корхоналарнинг ривожланиш ва тадқиқот марказлари фаолиятини йўлга қўйиш учун белгиланган тартибда шакллантириладиган рўйхатлар бўйича ўз эҳтиёжлари учун олиб келинадиган, Ўзбекистон Республикасида ишлаб чиқарилмайдиган лаборатория жиҳозлари ва анжомлари 2028 йил 1 февралга қадар божхона божидан озод этилади.

Тадбирда Вазирлар Маҳкамасининг 2025 йил 11 февралдаги “Божхона маъмуриятчилиги тартиб-таомилларини такомиллаштириш бўйича қўшимча чора-тадбирлар тўғрисида”ги 77-сон қарорига ҳам алоҳида тўхталиб ўтилди. Мазкур қарор билан ташқи савдо шартномалари сони 22 тадан 6 тага қисқартирилиб, ташқи савдо иштирокчилари учун битта шартнома доирасида турли божхона режимларидан фойдаланиш имкони яратилди.

Учрашув давомида тадбиркорларнинг божхона тизимига оид муаммолари ва таклифлари ўрганилди.